Opus 264/ 1984
Anders als in China gelten uns Drachen als Bedrohung. Durch
drei Drachen sehe ich unsere Welt bedroht: den land- und lebenfressenden
Autoverkehr, den Rüstungswahnsinn und unsere Beschränktheit, Anmaßung und Gier.
Drei Drachn lem in unsam Land
und fressn oissen zamm!
Se hom greisliche Wossakepf,
es feiht eah jede Scham,
es feiht eah jede Scham.
Da erste Lindwuam schdinkt und schnead,
ea is aus Blech und Chrom.
Ea windt se üwa Beag und Toi,
grod wia a Karzinom.
Man roit eahm schwoaze Teppich aus,
aus Schuda und aus Tea,
boid is des ganze Land zuadeggt -
doch ea waej immer meah,
boid is des ganze Land zuadeggt -
doch ea waej immer meah!
Sei Atem is so giftig,
dass unsre Wälder schdeam.
Und d Leit weand oizamm narresch,
vo seim Gschdang und vo seim Leam.
Ea frißt Kinda und Erwachsene,
zwaejftausnd in am Johr,
und ungefähr fuchzg Moi sovaej,
kemmand grod no so davo!
Da zwoate Drachn mog am liaban
s Schtrammsteh und s Marschian.
Eahm gfreits, wenn alle kloana Mandln
wia aafzong funktionian.
Ea gfreid se üwa Facklschein
und üwa zackigs Gschroa,
und unsa alla Schteiagaejd
fraßa am liaban ganz alloa.
Ea voschanzt se mit Atombombn
zwischn uns und red uns ei:
Mia waad ma koi Geisln ned,
und nua zweng eahm so frei!
Seine Düsnjaga fauchand üwa unsa Land,
mia zidan oft voa Angst und
volian no an Voschtand.
Da dritte Drachn is da schlimma,
ea wohnt in unsam Hian.
Mia loss man bei uns wohna
und uns vo eahm dressian.
Ea hetzt uns oizamm genganand
is schuid an Gia und Neid,
ea gfreid se wenn ma hassn
und üwa jedn Schtreit,
ea gfreid se wenn ma hassn
und üwa jedn Schtreit.
Ea treibt uns o zum Raffa,
zum Kaffa und zum Schtaejhn.
Ea mocht aus uns an Woif
und sogt uns wos ma waejn.
I sog enks Leit, wenn ma den drittn
Drachn amoi votreim,
dann weand die erstn Zwoa woih
aa nimma länga bleim!