Opus
161/ 1980
Wenn ich in der
Kreuzberger Naunynstraße am Fenster saß und den schmutzigen Asphalt betrachtete,
malte ich mir aus, die Straßenschlucht sei ein Garten mit großen Laubbäumen,
Obstgehölzen, Gemüsebeeten, weidenden Tieren, einem gewundenen Bächlein,
spielenden Kindern. Und statt heulender Motoren und Türenschlagen füllte die
Ohren Vogelgesang.
I hob amoi gwohnt in ana
groußn Schdod,
wo s grod Schtraßn, Haisa und Autos gem hod.
I waar boid dastiggt voa Gschtang und Rauch,
woit so gean an Baam hom voa meim Haus.
Doch oamoi, schtaejts enk vor, mittn aus m Tea,
woggst wirkle voa meim Haus a kloans Baimal hea.
Üwa d Nacht hods scheins d Schtraß duachdruggt,
und da Vokeah hods zerst ned gjuckt.
Bei Tog hom dann d Autos dem Baimal zuagsetzt,
und hamms scho dadetscht ghod zu guata Letzt.
Do hobama denkt, wenn eahm i ned beischteh,
dann koihnses no ganz o und es waar so schee.
Mit Piggl und Schaufe bine dann
eine in d Schtraß, boid hättns me dafohn.
Vor Zoan howe dann an Vokeah aafghoitn
und d Leit umadum hom gschimpft und gschoitn.
Nacha howe mitm Pickl an Tea
aafbeggt
und d Autofahra hamd me aa
no dableggt.
Ghupt hom s wia narresch
und mia hods pressiad,
doch s Baimal howe ausgrom, unbeiad!
Dahoam hobes dann in mei Bett eineglegt,
hobs gossn und mit meim Duchad zuadeggt.
s hod ned lang dauat, dann hodasse griaht
und s wochsn ogfangt und aa glei bliaht!
Mei Bett war scho ziemle boid z kloa,
des Baimal is gwochsn, wia sunst in fuchzg Joah.
Es hod aus m Fensta und aus m Dach triem,
grod seine Wurzln sand im Bett drinn bliem.
Am andan Tog hod mei Baam scho trong,
hundattausnd Kastanien, do kannst jedn frong!
War des a Freid, mi hods fast zrissn,
hob vor lauta Liab in Baam einebissn.
Do hod asse gschiedld, am End vor Schragga,
grod konnte den nächstn Ast no bagga
und hob me wia a Aff einfach aaffeghängt
sunst häds woih ned grod Kastanien grengt.
Hundattausndfach sands duach d Luft gflong
hom se duachn Tea eineboaht in Bon.
Aus jeda Frucht is a Baam geboan
und d Autofahra sand voiends narresch woan.
D Feiawehr is kemma und aa d Polizei
woitnd schnaej die Baam umschnei.
Gsaglt und ghaut hom s üwa a Wocha
doch de Baam hom aaf Gwoit ned ogsprocha!
Unsa Schdod steht seither mittn im Woid
und d Baam hom alle Schtraßn akoiht.
Nirgands is mehr a Auto zum hean
dafür wochsnd übaroi Schwamma und Bean.