Moang bau ma uns a Haisl

Opus 155/ 1979

 

Wenn einer für sich ein Haus baut, dann soll man ihn in Ruhe lassen! Er hat das Recht so schön oder so ge­schmacklos zu wohnen, wie es ihm gefällt. Nur kei­nem Nachbarn darf er schaden damit!

 

Moang bau ma uns a Haisl,

wia mas brauchand und hom woin.

Genau a so wia mas uns voaschtaejn,

ned wia s nach da Noam sa soin!

 

Bei uns is nix aus Plastik,

s is ois aus Loahm und Hoiz.

Aaf Modekraampf do pfeif ma

und do draaf samma schtoiz!

 

Hom schpekuliad und zeichnet,

samma dabei fast schpinnad woan,

doch wenne dann an s Amt deng,

blahts ma no an Hois voa Zoan.

 

Do sitznd Leit, mei de sand gscheid!

Üwa ois hom s ebbs zum Soßn!

Paragraphn gibts, des sog enk,

megst s Bau am liaban lossn!

 

Einheitshaisa mechtns,

wia d Soidatn, gleich und grau,

wenns da heit d Neibautn so oschaust

- a kloakariade Modnschau!

 

Mecht a Haisl wiares im Kopf han,

koa normiate Schtei!

Saejbst wenn meine Wänd ned ganz gred sand,

no und, wos isn dabei!?

 

Mei Haus, des soi vo mia zoing

und vozwickt sei wia mei Denga!

Fraale, zammfoin soids ned glei,

und es soit ned einerenga.